پی ایس ایل میں شریک تمام کھلاڑی وعملے کا کورونا ٹیسٹ منفی، کلیئر قرار

Spread the love

کورونا ٹیسٹ منفی,پی سی بی نے لیگ میں شریک 128 کرکٹرز اور سٹاف کا ٹیسٹ کروایا جو منفی آیا


تمام کھلاڑی اور آفیشلز محفوظ اور تندرست ہیں اور وہ بغیر کسی خدشہ کے ایک بار پھر اپنے اہل خانہ کاحصہ بن گئے ہیں، دعاگو ہوں کہ حالات جلد معمول پر آئیں اور ہم جلد میدانوں میں صحت مندانہ سرگرمیوں کا انعقاد دیکھ سکیں، 25 غیر ملکی کھلاڑی، اسپورٹ اسٹاف میں شامل اراکین اور میچ آفیشلز اپنے اپنے وطن واپس لوٹ چکے ہیں،وسیم خان


لاہور(سپورٹس رپورٹر)پاکستان کرکٹ بورڈ(پی سی بی) نے پی ایس ایل 2020 میں شریک 128 کھلاڑیوں، اسپورٹ اسٹاف اراکین،میچ آفیشلز، براڈکاسٹرز اور ٹیم مالکان کے کورونا وائرس کے ٹیسٹ کروائے، پی سی بی نے تصدیق کیہے کہ ان تمام افراد کے ٹیسٹ منفی آئے ہیں۔پی سی بی نے احساسِ ذمہ داری کے تحت ان ٹیسٹوں کو منعقد کروانے کا فیصلہ کیا۔ علاوہ ازیں، ملتان سلطانز کی جانب سے16 مارچ بروز پیر کو کروائے گئے کورونا وائرس کے تمام17 ٹیسٹ کے نتائج بھی منفی آئے ہیں۔چیف ایگزیکٹو پی سی بی وسیم خان کا کہنا ہے کہ پاکستان کرکٹ بورڈ اور ایچ بی ایل پاکستان سپر لیگ کی ساکھ کے لیے ضروری تھا کہ ایونٹ کے اختتامی مرحلے تک شرکت کرنے والے کھلاڑیوں، اسپورٹ اسٹاف اراکین، میچ آفیشلز، براڈکاسٹرز اور ٹیم مالکان کے ٹیسٹ منفی آتے۔انہوں نے کہا کہ اس پس منظر میں پاکستان کرکٹ بورڈ اس بات کی تصدیق کرتے ہوئے خوشی محسوس کررہا ہے کہ تمام کھلاڑی اور میچ آفیشلز محفوظ اور تندرست ہیں اوروہ بغیر کسی خدشہ کے ایک بار پھر اپنے اہلِ خانہ کاحصہ بن گئے ہیں۔وسیم خان نے کہا کہ پی سی بی اپنے ملازمین کے مکمل تحفظ کے لیے احتیاطی تدابیر پر عمل کرتا رہے گا۔ انہوں نے کہا کہ وہ تمام مداحوں سے درخواست کرتے ہیں کہ وہ احتیاط برتیں اور معاشرے کے دیگر افراد کی بہبود کا بھی خیال رکھیں۔ انہوں نے کہا کہ ہم حفظانِ صحت کے اصولوں پر عمل کرکے اس وباء سے نجات حاصل کرسکتے ہیں۔چیف ایگزیکٹو پی سی بی نے کہا کہ ہمیں مصافحہ کرنے یا گلے ملنے سے پرہیز کرنا ہوگا۔ انہوں نے کہا کہ اجتماعات سے دور رہیں اور کھانسنے یا چھینکنے والے افراد کے ساتھ قریبی رابطے سے گریز کریں۔ چیف ایگزیکٹو پی سی بی نے مداحوں سے درخواست کی ہے کہ وہ وباء سے نجات کے لیے دوسروں کو حفاظتی تدابیر اختیار کرنے کے لیے بھی آگاہی فراہم کریں۔وسیم خان نے مزید کہا پی سی بی دعاگو ہے کہ حالات جلد معمول پر آئیں اور خواہش ہے کہ ہم جلد میدانوں میں صحت مندانہ سرگرمیوں کا انعقاد دیکھ سکیں۔اس دوران تمام 25 غیر ملکی کھلاڑی، اسپورٹ اسٹاف میں شامل اراکین اور میچ آفیشلز اپنے اپنے وطن واپس لوٹ چکے ہیں۔

منتظمین ٹی ٹوئنٹی مینز ورلڈ کپ2020 شیڈول کے مطابق منعقد کروانے کیلئے پرعزم

کورونا ٹیسٹ منفی

اس خبر پر اپنی رائے کا اظہار کریں

اپنا تبصرہ بھیجیں