جسٹس آصف سعید کھوسہ کل نئے چیف جسٹس سپریم کورٹ کے عہدے کا حلف اٹھائیں گے

Spread the love

چیف جسٹس میاں ثاقب نثار رواں آج 17 جنوری کو ریٹائر ہورہے ہیں، ان کے بعد جسٹس آصف سعید کھوسہ چیف جسٹس سپریم کورٹ آف پاکستان کا عہدہ سنبھالیں گے۔

جسٹس آصف سعید کھوسہ 21 دسمبر 1954 کو صوبہ پنجاب کے ضلع ڈیرہ غازی خان میں پیدا ہوئے، ان کے تعارف میں ایک انفرادیت ان کی تعلیمی قابلیت اور سب سے زیادہ فیصلے تحریر کرنے جج بتائے جاتے ہیں۔

انہیں سابق وزیر اعظم یوسف رضا گیلانی کے خلاف توہین عدالت کے مقدمے سے شہرت ملی جبکہ سپریم کورٹ نے سابق وزیر اعظم نواز شریف کے خلاف پاناما کیس میں بھی جسٹس آصف سعید کھوسہ نے دوسرے ججوں کے ساتھ اختلاف کیا اور اپنے اختلافی نوٹ میں نواز شریف کو نااہل قرار دینے کی سفارش کی تھی۔

انہوں نے 1969 میں میٹرک کے امتحان میں ملتان بورڈ سے پانچویں جبکہ 1971 میں انٹرمیڈیٹ میں لاہور بورڈ اور 1973 میں کورنمنٹ کالج یونیورسٹی لاہور (جو اس وقت گورنمنٹ کالج تھا اور پنجاب یونیورسٹی کے تحت امتحانات منعقد کراتا تھا)پنجاب یونیورسٹی سے پہلی پوزیشنز حاصل کیں، اسی یونیورسٹی سے جسٹس آصف سعید کھوسہ نے 1975 میں انگریزی میں ایم اے کیا، ان کی قابلیت کی وجہ سے انہیں 3 مرتبہ نیشنل ٹیلنٹ اسکالرشپ سے نوازا گیا۔

ایم اے کے بعد اعلیٰ تعلیم کے لیے جسٹس آصف سعید کھوسہ نے برطانیہ کا رخ کیا، جہاں 1977-1978 مین کیمبرج یونیورسٹی سے قانون کی 2 ڈگریاں حاصل کیں، 1979 میں وطن واپس آئے اور لاہور ہائیکورٹ سے وکالت کا آغاز کیا اور 1985 میں سپریم کورٹ کے وکیل بن گئے۔

20 سال تک وکالت جاری رکھنے کے بعد جسٹس آصف سعید کھوسہ 21 مئی 1998 میں لاہور ہائیکورٹ جبکہ 2010 میں سپریم کورٹ کے جج منتخب ہوئے۔

مئی 1998 میں آصف سعید کھوسہ لاہور ہائی کورٹ میں جج مقرر ہوئے اور جب سابق صدر جنرل ریٹائرڈ پرویز مشرف نے 7 نومبر 2007 کو ملک میں ایمرجنسی نافذ کرکے آئین معطل کیا تو جسٹس آصف سعید کھوسہ بھی ان ججز میں شامل تھے جنہوں نے ‘پی سی او کے تحت حلف اٹھانے سے انکار کیا۔

اگست 2008 میں وکلا کی تحریک کے بعد وہ لاہور ہائی کورٹ میں جج کی حیثیت سے بحال ہوئے۔

اس کے علاوہ جسٹس آصف سعید کھوسہ 4 کتابوں کے مصنف ہیں جن میں، ہیڈنگ دی کانسٹیٹیوشن، کانسٹیٹیوشنل اپولوگس، ججنگ ود پیشن اور بریکنگ نیو گراونڈ شامل ہیں۔

جسٹس آصف سعید کھوسہ کو لمز یونیورسٹی، بی زیڈ یو اور پنجاب یونیورسٹی لا کالج میں قانون پڑھانے والوں میں شامل ہیں، ایک اندازے کے مطابق جسٹس آصف سعید کھوسہ 18 سال سے زائد عرصے میں 50 ہزار کے قریب مقدمات کے فیصلے سنا چکے ہیں۔

صدر مملکت ڈاکٹر عارف علوی نے جسٹس آصف سعید کھوسہ کو پاکستان کا 26 واں چیف جسٹس تعینات کرنے کی منظوری دے چکے ہیں، موجودہ چیف جسٹس میاں ثاقب نثار آج 17 جنوری کو ریٹائر ہوجائیں گے، جس کے بعد جسٹس آصف سعید کھوسہ کل 18 جنوری کو عہدے کا حلف اٹھائیں گے۔

چیف جسٹس کے عہدے پر 3 سو 47 دن تک فائز رہنے کے بعد جسٹس آصف سعید کھوسہ رواں سال 20 دسمبر کو ریٹائر ہوجائیں گے۔

ان کے بعد جسٹس گلزار احمد اس عہدہ پر فائز ہوں گے اور وہ یکم فروری 2022 تک چیف جسٹس کے عہدے سے ریٹائر ہوجائیں گے۔

اپنا تبصرہ بھیجیں